ဆွန်ဟောင်မင်ကို တော့တင်ဟမ်ဟော့စပါးကွင်းကြီးထဲမှာ ဂုဏ်ပြုနုတ်ဆက်ပွဲပြုလုပ်ပေးခဲ့တဲ့ စပါးအသင်း

တော့တင်ဟမ်ဟော့စပါး (Tottenham Hotspur) အသင်းရဲ့ ဂန္ထဝင် ကစားသမားဟောင်းကြီး ဆွန်ဟောင်မင် (Son Heung Min) ကတော့ မနေ့ညကကစားခဲ့တဲ့ ချန်ပီယံလိဂ်ပွဲစဉ်မတိုင်မီ သူ့ရဲ့ အသင်းဟောင်း ပရိသတ်တွေကို စိတ်လှုပ်ရှားဖွယ်နှုတ်ဆက်စကားတွေ ပြောကြားသွားခဲ့ပါတယ်။ "ကျွန်တော့်ကို ခင်များတို့ မေ့မသွားလောက်ဘူးလို့ မျှော်လင့်မိပါတယ်။ ကျွန်တော်လည်း ခင်ဗျားတို့ကို ဘယ်တော့မှ မေ့မှာမဟုတ်ပါဘူး။ တော့တင်ဟမ်ဆိုတာ ကျွန်တော့အတွက်အမြဲတမ်း အိမ်တခုလိုဖြစ်နေမှာပါ" "ဒီမှာရှိခဲ့တဲ့ အချိန်တွေဟာ အရမ်းကိုအံ့သြစရာကောင်းပြီး မယုံကြည်နိုင်စရာ ၁၀ နှစ်တာ ကာလပါပဲ" "ခင်ဗျားတို့တွေ အယ်လ်အေ (LA)ထိလာပြီး ကျွန်တော့ကို အားပေးကြတာ တကယ့်ကိုဝမ်းမြောက်မိပါတယ်။ စပါးအသင်းလည်း ဒီထက်မကအောင်မြင်ပါစေလို့ ကျွန်တော်ဆုတောင်းပေးပါတယ်။" မေဂျာလိပ်ကိုပြောင်းရွေ့သွားစဥ်က နုတ်ဆက်ပွဲမပြုလုပ်ပေးခဲ့ရတဲ့ ဆွန်ဟောင်မင်အတွက် စပါးအသင်းဟာ ယခုချိန်မှာတော့ ဂုဏ်ပြုနှုတ်ဆက်ပွဲတစ်ခု ပြုလုပ်ပေးခဲ့ပြီး၊ ကလပ်အပေါ် သူ့ရဲ့ ပေးဆပ်မှု့တွေကို အသိအမှတ်ပြုခဲ့တာလည်းဖြစ်ပါတယ်။