အီတလီလက်ရွေးစင်အသင်းရဲ့ ဆင့်ခေါ်ယူမှု့ကို ပယ်ချလိုက်တဲ့ ဖက်ဒရီကို ခီယဲဆာ

လီဗာပူးလ် တိုက်စစ်မှူး ဖက်ဒရီကို ခီယဲဆာ (Federico Chiesa)ကတော့ လာမည့် နိုင်ငံတကာပွဲစဉ်တွေအတွက် အီတလီလက်ရွေးစင်အသင်းရဲ့ ခေါ်ယူမှုကို ပယ်ချလိုက်ကြောင်း လက်ရွေးစင်နည်းပြ ဂတ်တူဆိုက အတည်ပြုလိုက်ပါတယ်။ အီတလီလက်ရွေးစင်အသင်းရဲ့ နည်းပြ ဂျန်နာရို ဂတ်တူဆို (Gennaro Gattuso)ကတော့ ခီယဲဆာရဲ့ ဒီဆုံးဖြတ်ချက်ကိုတော့ လေးစားကြောင်း ပြောကြားသွားခဲ့တာပါ။ "ကျွန်တော် ခီယဲဆာနဲ့ မကြာခဏ စကားပြောပါတယ်။ ကျွန်တော်တို့ဟာ တစ်ဦးချင်းစီရဲ့ ဆုံးဖြတ်ချက် တွေနဲ့ ရင်ဆိုင်နေရတဲ့ ပြဿနာတွေကို ရိုးရိုးသားသား လေးစားဖို့ လိုအပ်ပါတယ်" "ကျွန်တော့်အတွက် ပြောစရာ တခြား ဘာမှ မရှိပါဘူး၊ ဒါဟာ အမှန်တရား ပါပဲ" ဆိုပြီး ပြောကြားသွားခဲ့တာဖြစ်ပါတယ်။ ခီယဲဆာအနေနဲ့ သူ့ရဲ့ ကိုယ်ပိုင်အခြေအနေ သို့မဟုတ် ကြံ့ခိုင်မှုဆိုင်ရာ ကိစ္စတွေကြောင့် လက်ရွေးစင်တာဝန်ကို ငြင်းပယ်ခဲ့တာ ဖြစ်နိုင်ပြီး၊ နည်းပြ ဂတ်တူဆိုကလည်း သူ့ရဲ့ ကိုယ်ပိုင် ဆုံးဖြတ်ချက်ကို လေးစားကြောင်း ပြောဆိုသွားခဲ့တာဖြစ်ပါတယ်။